ᑲᓇᓇᑲᑕᐧᐁᓂᑕᒪᐠ ᑭᒋᑲᒥᔾ
ᐯᔭᑕᐠ ᑲᓇᓇᑲᒋᑕᓂᐧᐊᐠ ᑭᒋᑲᒥᐠ ᑕᐣᑌ ᐱᑯ ᐃᔑ ᒥᔑᒧᑯᒪᐣ ᐊᐢᑭᐠ ᓀᐢᑕ ᑲᓇᑕᐢᑭᐠ ᓇᐧᐊᐨ ᐁ ᐊᑎ ᐊᐧᑲᐱᐳᐠ ᓀᐢᑕ ᐧᐃᐸᐨ ᐁᓯᐧᑲᐠ᙮ ᓄᑯᓯᐧᐊᐠ ᓇᓇᑲᐤ ᔑᔑᐸᐠ ᑭᐧᐁᑎᓄᐠ ᐁ ᐃᐢᐸᓂᒋᐠ ᐁ ᐃᑐᑌᒋᐠ ᑲ ᐃᔑ ᐧᐊᐧᐃᒋᐠ ᑲ ᐃᔑ ᐧᐊᒋᐢᑐᓂᒋᐠ᙮ ᐁᓇᓇᑲᐧᐃᓇᑯᓯᒋᐠ ᔑᔑᐸᐠ ᑭᒋᑲᒥᐠ ᑲ ᐃᑕᒋᐠ ᐊᑎᐟ ᑲᒪᒥᔑᑭᑎᒋᐠ᙮ ᓀᐢᑕ ᐧᐃᓇᐧᐊᐤ ᐁᐧᐁᐧᐁᓂᒋᐠ ᑭᒋ ᑭᐧᐁᐸᓂᒋᐠ ᐧᐊᔦᐡ ᒥᑭᓯᐧᐃᐱᓯᐧᒪ ᓀᐢᑕ ᓂᐢᑭᐱᓯᐧᒪ ᐁ ᐊᑎ ᒪᒋᐸᓂᓂᒋ᙮ ᓀᐢᑕ ᐧᐃᓇᐧᐊᐤ ᑭᐧᐁᑎᓄᐠ ᐁ ᐃᐢᐸᓂᒋᐠ ᑲ ᐃᔑ ᐃᑕᐧᑲᓂᓂᑭ ᐅᐧᐊᒋᐢᑐᓂᐧᐊᐧᐊ᙮
ᒣᐧᑲᐨ ᒪᑲ ᐁᐱᑦᒪᐊᑭᐠ ᐊᐢᑲᐤ ᐊᑎᐟ ᑐᐅᐧᐊᐠ ᐊᐣᑌ ᓇᓀᐤ ᐧᐃᓂᐯᑯᐠ᙮ ᐊᐟᓯᐣᐯ ᓀᐢᑕ ᒉᒥᐢᐯ᙮ ᐅᑌ ᑲ ᐃᔑ ᑕᔑᓇᐧᐃᒋᐠ ᐧᐃᓂᐯᑯᐠ ᐁᒣᐧᑲ ᐱᐳᐠ ᒥᑐᓂ ᐁᐧᐃᐢᐧᑫᓯᐧᑲᓂᐠ ᑲ ᐃᔑ ᑕᔑᑫᒋᐠ ᐧᐊᐸᒣᐧᑲᐠ ᓀᐢᑕ ᐊᑭᐧᑲᐠ ᐧᐊᐸᐢᐧᑲᐠ ᒪᑲ᙮
ᐁᑯᑕ ᓀᐢᑕ ᐅᓴᒥ ᑯᑕᑭᔭᐠ ᐱᓀᓯᐧᐊᐠ ᑲ ᐃᔑ ᑕᔑᓇᐧᐃᒋᐠ ᐅᑌ ᐃᑌᑫᐢᑲᒥᐠ ᑭᔕᐧᐁᓂᑕᑯᓯᓇᓇᐤ ᒪᐡᑫᑯᐧᐃ ᐅᑭᒪᑲᓇᐠ ᐁ ᐊᑎ ᓇᓇᑲᑕᐧᐁᓂᑕᑭᐠ ᐅᑕ ᑲ ᐃᔑ ᑕᔑᓇᐧᐃᓂᒋ ᐅᐅ ᐱᓀᓯᐧᐊ᙮
ᐊᐢᐱᐣ ᐱᑯ ᐅᒪᐡᑫᑯ ᑲ ᐃᐧᑕᓂᐧᐊᐠ ( ᐅᑯ ᐃᓂᓂᐧᐊᐠ ᒪᐡᑫᑯᐧᐃ ᐃᓂᓂᐧᐊᐠ ᑲ ᐃᔑᓂᑲᑎᓱᒋᐠ ᐅᑎᔑᑭᔑᐧᐁᐧᐃᓂᐧᐊᐠ) ᐱᔑᔑᐠ ᐅᒪ ᑭ ᐯᒋ ᑐᑕᐧᒪᐠ ᑲ ᑭ ᐯᒋ ᐃᔑ ᐱᒪᑎᓯᒋᐠ᙮ ᐁ ᑭᓇᓇᑲᒋᐊᒋᐠ ᐅᐅ ᐱᓀᓯᐧᐊ ᐁᑭᓇᓇᑲᒋᐊᒋᐠ ᑭᒋ ᑭ ᐃᑕᐧᑲᓂᓂᐠ ᑲ ᐃᔑ ᐧᐊᐧᐃᓂᒋ ᓀᐢᑕ ᒪᑲ ᐁ ᑭᒪᓇᒋᐊᒋᐠ ᐁᑲ ᑭᒋ ᐅᐧᔕᐧᐊᒋᐠ ᐁ ᐊᐧᓀᔓᒧᓂᒋ ᐁᒥᒋᓱᓂᒋ ᓀᐢᑕ ᑲ ᐃᔑ ᐸᐢᑯᓂᒋ᙮ ᐅᑯ ᒪᑲ ᑲ ᐃᔑ ᑕᔑᓇᐧᐃᒋᐠ ᐱᓀᓯᐧᐊᐠ ᒧᓇ ᐅᔕᐃᑲᑌᓂᐤ ᒧᓇ ᐸᑭᑎᓇᑲᓂᐧᐊᐣ ᐊᐧᐁᓂᑲᐣ ᑭᒋ ᑕᔑᓇᐧᐃᐟ ᐊᐣᑕ᙮ ᐊᑎᐟ ᐱᑯ ᓂᐸᐊᑲᓂᐧᐊᐧᓇᐠ ᐧᒣᒋ ᐱᑯ ᑲ ᐊᐸᒋᐃᒋᐠ ᐁᒪᑯᔕᓂᐧᐊᐠ ᒣᐧᑲᐨ ᐁ ᐊᔭᒥᐃ ᑐᒋᑲᑌᐠ᙮ ᐅᒪᐡᑫᑯᐧᐃ ᐃᓂᓂᐧᐊᐠ ᑭᐢᑫᓂᑕᐧᒪᐠ ᑭᒋ ᐧᐊᓄᐤ ᐁ ᐅᒋ ᐱᒪᐊᒥᓂᒋ ᐅᐅ ᐱᓀᓯᐧᐊ ᓀᐢᑕ ᑭᔕᐢᐱᐣ ᐧᐊᓇᑕᐧᐃᑌ ᑲ ᐃᔑ ᑕᔑᓇᐧᐃᒋᐠ ᑲᑕ ᐸᑲᒥᐡᑲᑯᐧᐊᐠ᙮
ᑲ ᐃᔑ ᑭᐢᑫᓂᒥᒋᐠ ᐅᑯ ᐱᓀᓯᐧᐊᐠ ᑲ ᐃᔑ ᑕᔑᓇᐧᐃᒋᐠ ᐧᐃᓂᐯᑯᐠ ᐁᒥᔕᓂᐠ ᑲ ᐅᑕᒋᑫᒋᐠ ᐁᑭᒋ ᒪᒥᒉᑎᒋᐠ ᑭᓂᑲᐤ ᓇᓇᑲᐤ ᔑᔑᐸᐠ᙮ ᐁᓇᐧᐊᒋᒋᐠ ᐁᐧᐸᒪᔑ ᐱᒪᐊᑭᐠ ᐁᑕᐧᑲᑭᓂᓂᐠ ᑲᑐᑕᑭᐠ ᐱᑯ ᐁᐯᒋ ᐱᒪᐊᑭᐠ ᐁᓯᐧᑲᓂᓂᐠ᙮ ᒥᒉᐟ ᐅᑯ ᓇᓇᑲᐤ ᐱᓀᓯᐧᐊᐠ ᑕᔑᓇᐧᐃᐧᐊᐠ ᓇᓂ ᐧᐃᓂᐯᑯᐠ ᐁᐧᐸᒪᔑ ᑭᒋᐸᓂᒋᐠ᙮ ᓇᓇᑲᐤ ᐱᓀᓯᐧᐊᐠ ᐧᐁᐧᐁᐧᐊᐠ ᓂᐢᑲᐠ ᓀᐢᑕ ᓇᓇᑲᐤ ᔑᔑᐸᐠ ᓂᐱᐠ ᑲᑕᔑᓇᐧᐃᒋᐠ᙮
ᓇᓀᐤ ᐧᐃᓂᐯᑯᐠ ᓇᓇᑲᐤ ᐃᔑᓇᑯᓯᐧᐊᐠ ᐱᓀᓯᐧᐊᐠ ᑕᐱᐡᑯᐨ ᔐᔐᔑᐧᐊᐠ ᐳᐡᐧᑲᒐᔑᐧᐊᐠ ᒥᓯᐧᐁ ᐱᑯ ᓇᓇᑲᐤ ᐱᓀᓯᐧᐊᐠ ᑲᑕᔑᓇᐧᐃᒋᐠ ᑕᐧᐃᐨ ᐧᐃᓂᐯᑯᐠ᙮ ᒥᒉᑎᐧᐊᐠ ᐅᑌ ᐃᑌᑫ ᐧᐃᓂᐯᑯᐠ ᑲᑕᔑᓇᐧᐃᒋᐠ ᓇᓇᑲᐤ ᔐᔐᔑᐠ ᑲ ᐃᔑ ᐧᐊᑯᑕᑭᐠ ᓀᑌ ᒥᔑᒧᑯᒪᐣ ᐊᐢᑭᐠ ᑲ ᐯᒋ ᐅᒋᐸᓂᒋᐠ᙮
ᐊᐟᓯᐣᐢᐯ ᓀᐢᑕ ᒉᒥᐢᐯ ᐃᔑ ᑐᐅᐧᐊᐠ ᐁ ᐊᐧᓀᔑᒧᒋᐠ᙮
ᐁᑕᐧᑲᑭᓂᓂᐠ ᓄᑯᓯᐧᐊᐠ ᐅᑯ ᐱᓀᔑᔑᔕᐠ ᐁ ᑭᒋ ᒪᒥᒉᑎᒋᐠ ᓇᓂ ᐧᐃᓂᐯᑯᐠ ᐁᑕᔑᓇᐧᐃᒋᐠ ᐅᐸᐢᑯᐧᐃᐱᓯᑦ ᐱᓂᐡ ᐧᐁᐧᐁᐧᐃᐱᓯᐧᒪ ᐁ ᐃᑕᒋᐠ ᐁᓇᐧᐊᒋᒋᐠ ᐁᐧᐃ ᐱᒪᐊᑭᐠ᙮ ᐅᐧᕃᑎᐅᐠ ᐅᒋ ᑭᐢᑫᓂᒪᑲᓂᐧᐊᐧᓇᐠ ᐁᑐᑕᑭᐠ ᑲ ᐃᔑ ᑲᑫᐱᒋᒋᐠ ᐁᐱᒋᐸᓂᒋᐠ ᐁᐧᑲᓂ ᑲ ᐅᒋ ᑭᐢᑫᓂᒥᒋᐠ ᑕᐧᐃᐨ ᐧᐃᓂᐯᑯᐠ ᐁᑕᔑᓇᐧᐃᒋᐠ᙮
ᒪᒪᐢᑲᑌᓂᑕᐧᑲᐣ ᐁᐧᐊᐸᒥᒋᐠ ᐅᑯ ᐱᓀᔑᔕᐠ ᑭᒋ ᐧᐊᓄᐤ ᒥᔑᒧᑯᒪᓇᐢᑭᐠ ᐁ ᐅᒋᐸᓂᒋᐠ ᐅᑌ ᒉᒥᐢᐯ ᐁᐯᒋ ᐃᐢᐸᓂᒋᐠ ᑲᑕ ᒪᒪᐢᑲᑌᓂᑕᐧᑲᐣ ᓄᑯᓯᑌ ᐧᐊᐸᐢᐠ ᓀᑌ ᒥᔑᒧᑯᒪᐣ ᐊᐢᑭᐠ ᒪᒋᒍᐧᐃᓯᐟ ᑲ ᐃᔑᓂᑲᑌᐠ ᐊᐢᑭᔾ᙮
ᑭᒋ ᒪᒪᐢᑲᑌᓂᑕᐧᑲᐣ ᑲ ᐊᑎ ᐅᒋ ᑭᐢᑫᓂᒥᒋᐠ ᐅᑯ ᐱᓀᓯᐧᐊᐠ ᑲᐃᑕᒋᐠ ᐅᑕ ᐊᐢᑭᐠ᙮
ᐁᐧᑲᓂ ᒪᑲ ᓇᐢᐱᐨ ᑲ ᐅᒋ ᒥᐧᓀᓂᑕᑭᐠ ᒪᐡᑫᑯᐧᐃ ᐅᑭᒪᐧᐊᐠ ᐅᑌ ᐃᑌᑫᐢᑲᒥᐠ ᑲ ᐃᑕᒋᐠ ᑭᐧᐁᑎᓄᐠ ᐧᐃᓂᐯᑯᐠ ᑲᐧᐃ ᐅᒋ ᐊᑎ ᓇᓇᑲᒋᑕᓂᐧᐊᐠ ᒥᓯᐧᐁ ᐃᔑ ᐊᐧᐃᔭᔑᔕᐠ ᐅᒋ ᒥᓯᐧᐁ ᑲ ᐧᐃ ᐃᔑ ᒪᓇᒋᑕᓂᐧᐊᓂᓂᐠ ᑲ ᐅᑕᒋᑫᒋᐠ ᐅᑌ ᓇᓂ ᐧᐃᓂᐯᑯᐠ᙮
ᓂᑲᐧᐃᑕᒪᐧᐊᓇᓂᐠ ᒪᑲ ᐅᑯ ᐃᓂᓂᐧᐊᐠ ᐁᐧᐃᐧᐃᒋᐊᑭᒋᐠ ᐅᒪ ᑲ ᐅᒋ ᑐᑕᒪᐠ ᑭᔕᐢᐱᐣ ᒪᓯᓇᐅᑎᓱᐧᑕᐧᐁ ᐅᑕ ᒪᓯᓇᐃᑲᓂᐠ ᑲᑕ ᒥᐧᓀᓂᑕᐧᑲᐣ᙮ ᐅᑕ ᒪᑲ ᐃᔑ ᐃᑕᐱᐠ ᐅᒪ ᐃᑕᓯᓇᑌᐤ ᑫ ᐃᔑ ᐅᑎᓇᒣᐠ ᒪᓯᓇᐃᑲᐣ ᐁᐧᐃᑕᒪᑲᓂᐧᐊᐠ ᑭᒋ ᐧᐊᐧᐃᒋᐃᑲᐧᐃᔦᐠ: https://marine.wildlandsleague.org/
ᐁᑯᔑ ᑲᓇᐧᐊᐸᑕᒧᐠ ᑭᒋ ᑭᐢᑫᓂᑕᒣᐠ ᐊᒋᑫᐣ ᑲᑐᒋᑲᑌᐠ ᒪᓯᓇᐅᑎᓱᐠ ᑭᒋ ᒪᓯᓇᑌᑭ ᑭᑎᔑᓂᑲᓱᐧᐃᓂᐧᐊᐧᐊ ᒥᓯᐧᐁᐢᑲᒥᐠ ᐁᑭᐢᑌᓂᒣᑯᐠ ᐱᓀᓯᐧᐊᐠ ᓀᐢᑕ ᑯᑕᑭᔭᐠ ᐱᓀᔑᔕᐠ᙮
_________________________________
Editor's note: To read this article in both the English language and in the Cree language, the language of the Mushkegowuk people of the region discussed in the article, please go here. In that article, each paragraph presented in English is followed by the same paragraph in Cree. Cree translation provided by Angela Shisheesh.
Jeff Wells, National Audubon Society
ᒉᑊ ᐧᐁᓪᐢ ᒥᓯᐧᐁᐢᑲᒥᐠ ᐊᐧᐃᔭᔑᔑᐧᐃ ᐊᑐᐢᑫᐧᐃᐣ ᐊᐸᒋᐊᑲᐣ
Lawrence Martin, Mushkegowuk Council
ᐧᓚᕆᐣᐢ ᒪᕐᑎᐣ ᒪᐡᑫᑯᐧᐃ ᐅᑭᒪᐧᐃᐧᐃᓂᐠ ᐊᑐᐢᑫᓇᑲᐣ
Anna Baggio, Wildlands League
ᐊᓇ ᐸᔑᐅ ᐸᐧᑲᑕᐢᑭᔾ ᐊᐸᒋᐊᑲᐣ
Don Lyons, National Audubon Society
ᐧᑕᐣ ᓚᔭᐣᐢ ᒥᓯᐧᐁᐢᑲᒥᐠ ᐊᐧᐃᔭᔑᔑᐧᐃ ᐊᑐᐢᑫᐧᐃᐣ ᐊᐸᒋᐊᑲᐣ
Stan Senner, National Audubon Society
ᐢᑕᐣ ᓯᓄᕐ ᒥᓯᐧᐁᐢᑲᒥᐠ ᐊᐧᐃᔭᔑᔑᐧᐃ ᐊᑐᐢᑫᐧᐃᐣ ᐊᐸᒋᐊᑲᐣ